بزااف ديال الأمور كايطراو لينا فحياتنا اليومية و كانصنعو منهم الحدث وخا هوما حاجات بساط مايحتاجوش أنك تخمم فيهم . كلنا عندنا علاقات بين الغير لي كيلعب دور كبير فحياتنا , يعني صعييب أنك تنفي بلي الغير ماشي مهم فحياتنا سواء كان ذكر ولا أنثى حينتاش الغير هو لي كنتابرو شخصيا المرايا ديالك . نهار كادير شي حاجة زوينة دايمن خاص الغير يمدحك باش تسمى إنجاز مثلا شدينا واحد كيغني مزيان معمرو مغيتتسما فنان الا معتارفش ليه الغير بموهبتو
فنفس الوقت هاد الغير كيلعب دور كبير باش يهدم ليك حياتك ولا يزينها , باش نكونو مفاهمين مكايناش شي علاقة لي غادوم خصوصا فعصر السرعة ( السرعة ماشي غير فالتكنولوجيا ولكن فالأحاسيس و العمل وزيد وزيد) ولكن علاش فاش كيمشي هاد الغير كنمرضو راسنا فابور يعني خاص ضروري تكتائب و تمرض راسك على قبل واحد ولا وحدة محاولوش يضحيو بشي حاجة على قبلك
شخصيا نهار كنبدا شي علاقة مع شي حد كنعيش النهار بنهارو معاه وكانكون عارف أن واحد النهار أنا غنتبدل عليه ولا هو غيتبدل عليا بسبب مشترك لي هو واحد مبقاش كايعمر الفراغ للشخص لاخر . وحتى قلة الهضرة مكاتعنيش أنك مبقيتيش عزيز على داك الشخص بالعكس شحال من واحد عزيز عليا ولكن كنشوفو فالزنقة كنقلب الطريق ببساطة حينتاش مغينفعني بوالو .
No comments:
Post a Comment